काठमाडौँ। राष्ट्रिय आविष्कार केन्द्रका प्रमुख रहेका डाक्टर महावीर पुनले विरगन्जमा रहेको कृषि औजार कारखाना सञ्चालनको लागि सुरु गरेको आफ्नै आत्मकथा विक्री अभियानले आज दुईसय दिन पूरा गरेको छ ।
दुईसय दिनको अभियानमा पुनले २ हजार ८ सय ४० किलोमीटरको यात्रा पूरा गर्दै १ लाख २५ हजार वटा किताब बिक्री गरेका छन् ।
कारखाना सञ्चालनको लागि सरकारबाट पर्याप्त सहयोग नमिलेको भन्दै पुनले आफ्नो आत्मकथा विक्रीबाट उठेको रकम कारखानाको निर्माणमा लगाउने सोचको साथ अभियान सुरु गरेका हुन् ।
कृषि उत्पादनलाई आधुनिकीकरण गर्ने गरी आफ्नै देशमा औजार, मेसिनरी सामग्री उत्पादन गर्ने भन्दै उनले आविष्कार केन्द्र मार्फत विरगन्जमा बन्द भैसकेको सरकारी उद्योगलाई पुनः सञ्चालनमा ल्याएर मेसनरी औजारको परीक्षण गरेका छन् ।
उद्योगमार्फत धान काट्ने मेसिन, धान झार्ने मेसिन, आलु खन्ने, गोडने र रोप्ने मेसिन लगायत दर्जन बढी मेसिनहरूको सफल परीक्षण भएको उनले बताए ।
कृषि प्रधान देशमा आफ्नै देशमा उत्पादन भएको कृषि औजार प्रयोग गर्न सके उत्पादनको लागत मूल्य घटने, औजारको रूपमा देशको पैसा बाहिर नजाने र देशमानै रोजगारी बढ्ने आफ्नो अपेक्षा रहेको पुनको भनाई छ । आफूहरूले ट्रायल गरेको सामग्रीले सोचे अनुसारनै काम गरेको बताउँदै पुनले अब चाडै उत्पादनको काम अघि बढाउने योजना रहेको सुनाए ।
केन्द्र, प्रदेश र स्थानीय तहको सरकारल कृषि उत्पादनलाई जोड दिनको लागि पनि आधुनिक कृषि उत्पादनको लागि आवश्यक मेसिन उत्पादनलाई बढवा दिनुपर्ने उनको धारणा छ ।
यसैबीच राष्ट्रिय आविष्कार केन्द्रका प्रमुख महावीर पुन आफ्नो आत्मकथा बिक्री गर्ने क्रममा बागमती प्रदेशको राजधानी हेटौँडा आइपुगेका छन् ।
चितवन हुँदै शनिवार मकवानपुर छिरेका पुनले मकवानपुरको मनहरी गाउँपालिकाबाट आफ्नो आत्मकथाको विक्री सुरु गर्दै आइतबार हेटौँडा बजार क्षेत्र आइपुगेका हुन् । मनहरी क्षेत्रमा सयौँ किताब बेचेका उनले हेटौँडामा मात्र आइतबार र सोमबार गरी १ हजार ४ सय किताब बिक्री भएको डाक्टर पुनले बताए ।
मकवानपुरको हेटौँडा आसपासको क्षेत्रमा अझै ३ दिन बढी रहने आफ्नो अभियान रहेको पुनको भनाइ छ ।